Sigatteng dohot Sitappan episode 5

By: sirgalung   Date: Desember 29, 2018   In: Sigatteng   2 comments  

Sigatteng dohot Sitappan episode 5
ndang namora hita da amang manang parhauma na bidang.

Mulak sian parsikkolan sai masi paingotan do Sigatteng dohot Sitappan taringot tu parsiajaran nasida di sikkola.

Mohop ni ari, hodokan ma Sigatteng, di palumbang ibana ma dasi nai.
Abang...! Mohop ate?
Ima anggi! Mohop ari soadong tes ta. Hape dao nai huta.
Sambil masitiopan tangan nasida nadua mandalani dalan natu huta i.
Adong do tugas mu dibaen guru?
Ima abang, PR sinabudari dang diperiksa dope, alana dang ro ibu i. Jadi karangan nami i tu ari rabu ma periksa on i. Jadi sempat dope karejoan annon muse.

Bah... attong budari ma tapasae ate!

Olo abang.

Satonga pardalanan nai asa sahat tu huta, ro ma rimbus.

Marlojong ma halaki nadua asa unang tonu baju sikkola na i. Udan lam karas, maradi ma halaki di sopo - sopo. Lugun satokkin i ... holan suara ni udan dohot longgur ma tarbege.

Nga male au abang?

Au pe ngamale!

So siang dope udan on ate?

Dang sadia leleng dang tahan be atap ni sopo i manahan aek udan i. Maniris ma aek tu halaki nadua. Abang...! Ta taon ma... mulak ma hita beta?
Nga tonu hita ate?
Molo songoni beta ma anggi...!

Di taon halaki nadua ma udan i mulak tu huta.
Uma ....
Uma.... bukka jo!
Ngamulak hami sian sikkola!
Ai boasa taonon muna udan i ?.  Maradi do hami nakkin di sopo - sopo ni amang boru Si Nur, hape boccor do sopo i!.  Hutaon hami ma udan uma ....
We tahe ... toe ... toe...  masuk ma hamu nadua amang. Nga ngalian hamu ate ....!

Hatop bittor bukkahon baju mu na tonu i...! Annon mangisap tu badan mi. Marsahit ho annon amang.
Ima hata ni natua tua i. Di bagas roha ni natoras na i, aha  ma baju muna marsogot ??? Songon na tarilu oma nai.

Sigatteng dohot Sitappan nga laho tu dapur mambuat sipanganon. Ala ni male na halaki nga hatop hatop be di allangi. Gulamo dohot bulung garkau ima menu ni sipanganon i.

Dang laho hita annon uma tu ladang?
Ai udan dope amang!  Molo adong PR mu, ima annon karejoi hamuna.
Ima Uma, godang PR nami. Ima annon hu karejoi hami.

Sambil manucci piring Sigatteng mambege hatai....
Ido bah PR nami hape.

Dia among uma?   Naso mulak dope sian ladang...?
Daong dope amang...! Ala ni udan on do ra dang mulak dope.
Bah nga male nuaeng i... !   

Dung so udan i, ditaruhon halaki nadua ma iddahan tu among nai.
Ai nga banjir be baruran ni parcabean on?
Marhua ma au annon among?  Inna Sigatteng.
Paima karing baruran i, mambuat sagak ma hamu nadua da...!
Olo...!  Bittor lao ma halaki tu hauma i. Diboan halaki ma sasabi, lage dohot pambantingan.

Dijabu ni halaki. Dijomur hon oma na ma baju  sikkola i tu lambung ni tataring.